Ilonggo Indulgence

Kon kis-a napanumdum ko pano ayhan kon magsulat ako sa Hiligaynon diri? Baw ti damo gid guro indi ka intiende, luwas dulang kon kasimanwa ko gid mabasa, kapin pa kon karay-a. Pasensya dulang sa indi kamaan kay tulad daw gusto ko gid maghambal sa tumandok ko nga dila. Baw kabudlay man sagad panumdom kon magsulat sa Ingles kay ti kinanglan sakto gid grammar mo kag mga tinaga para mahangpan ka ka manugbasa mo, indi bala? Ti bahala sila ya subong eh. Basta ako ya gakatol tudlo ko magpitik keyboard nga Ilonggo ang tinaga gaguwa sa monitor ko.

Subong ti ari ko sa opisina, as usual sa conference room. Bag-o lang matapos meeting namon kag gahulat makadto sa Market Market sa The Fort para sa blood-letting event namon with Red Cross (basi mahambal sila waay ko ga-obra di). Indi ko na lang pagdetalye di ah, kay sensitive daan kumpanya namon sa mga tactical activities namon. Syado kagrabe ang kumpetisyon sa listeners kag advertisers. Para mabal-an nyo output ti pamati dulang kamo sa mga istasyon namon, kadto lang kamo di sa gin-obra ko nga website .

Ang mahambal ko lang, sako gid ako subong nga Nobyembre. Luwas sa pagdumdum sang kalag sang akon amay sang nagligad nga petsa uno kag dos (daw nakaduha ka misa gid ko to), amo man ni ang bulan sang akon pagkatawo, petsa otso, kag sang akon nobya, petsa biente siete. Sang lunes nag-enrol man ko sa UP, kag damo gid ko talapuson nga papers. Mga tunga-tunga sang bulan nga ni umpisa na ko pamakal regalo kag ticket pauli sa Pototan. Nahidlaw na ko sang balay namon, bisan waay pa matapos ang kisame kag mga palitada. Nahidalaw man ko magduaw sa Tatay ko kay waay gid ko ka puli sang Pista Minatay. Makilit-anay man kami sang mga hinablos ko nga mapuli man pagkatapos sang sobra apat ka tuig sa tate. Bakasyon lang sila kay gaeskwela pa, kag subong lang nila makit-an ang lolo nila nga gahamyang na sa patyo eh. So, ang gahulat sa ila kasadya kag kasubo man. Ang maayo lang mabaskog pa si lola nila kag sako ugtas sa duha nya ka apo sa balay. May isa pa ka 3-month old gahulat mag-entra sa gilinamo nila. Nami daad magpost pictures nila di pero for privacy reasons hasta diri na lang sila sa cellphone ko ah. Baw daw kalawig naman gali nasulat ko. Sige malakat na ko sa Fort.

Ti ikaw ya ano plano mo?